Einnig er hægt að panta borð í síma 482 4099

Bóka gistingu

01.10 2018

Menam - tímamót

Í gær, sunnudaginn 30. september var síðasti starfsdagur Menam í þeirri mynd sem hann hefur verið rekin síðustu 21 ár. 

Þeir aðilar sem tóku við rekstrinum nú í sumar keyptu ekki vörumerkið "Menam" en fengu að nota nafnið og reka Menam fram á haustið meðan þau undirbjuggu breytingar á staðnum því ekki þótti skynsamlegt að breyta um matseðil og nafn á miðri sumarvertíð. 

Á laugardaginn kemur (6. október) mun því opna nýr og efnilegur veitingastaður í húsnæðinu að Eyravegi 8 - VEITINGASTAÐURINN KRISP - sem leggur áherslu á ferska nálgun á hollusturéttum fyrir fjölskylduna.

Margir hafa spurt - hvað verður um Menam og matinn sem hefur þar verið framreiddur síðustu 20 ár?  Mun Menam hætta starfsemi endanlega?

Svarið við því er líklega nei - við sem eigum "Menam" vörumerkið erum að skoða hvaða möguleikar eru í stöðunni.  Við höfum verið að skima eftir hentugu húsnæði á Selfossi með það í huga að opna á nýjum stað með breyttu sniði - leggja áherslu á hraða og góða þjónustu í hádeginu og "take away" á kvöldin.    

Næstu dagar og vikur munu því skera úr um það hvort og þá hvernig Menam mun eiga framhaldslíf....

Fylgist með á þessum vettvangi!

....

Um Menam

Starfsfólk Menam
Á Menam starfar samheldinn hópur sem hefur það að markmiði að veita góða þjónustu og notalegt viðmót. Um helgar klæða þjónarnir sig upp í austurlenskum fatnaði til að fullkomna stemmninguna. Léttleiki og bros einkennir hópinn sem skilar sér bæði í þjónustu og matargerð.

Saga Menam
Veitingastaðurinn Menam var opnaður 5. desember 1997 af þeim hjónum Sigurði Guðmundssyni og Jaroon Nuenmaroeng. Stuttu síðar opnuðu þau svo gistiheimili á efri hæð hússins. Aðal áhersla hefur verið á thailenska matargerð frá upphafi. Menam hefur á að skipa sama matreiðslumann af thailenskum uppruna frá opnun staðarins.

Þann 30. júlí 1999 keypti Kristín Árnadóttir reksturinn af þeim hjónum og rekur hún Menam í dag ásamt fjölskyldu sinni.
Hjá fyrirtækinu starfa um 15 manns að jafnaði á ársgrundvelli. Er það stefna okkar að skapa skemmtilegan og áhugaverðan vinnustað þar sem starfsfólki jafnt sem gestum líður vel að vera.

Saga hússins
Húsið að Eyravegi 8 á sér langa og merkilega sögu. Það var byggt árið 1945 af Þorsteini Guðmundssyni rafvirkjameistara. Húsið hefur gengt ýmsum hlutverkum í gegnum tíðina, fyrst var þar rekin verslun og rafmagnsverkstæði á neðri hæðinni en íbúðarhúsnæði á þeirri efri. Upp úr árinu 1948 keypti Selfosshreppur húsið og var rekin ýmis starfsemi á vegum hreppsins og síðar bæjarins í húsinu.
Sem dæmi má nefna Hreppsskrifstofur og síðar Bæjarskrifstofur, bókasafn, Hitaveita og rafveita Selfossbæjar, Félagsmálastofnun Selfoss og Samband Sunnlenskra Sveitarfélaga undir það síðasta.

Í stigagangi upp á aðra hæð hússins þar sem gistiheimilið er, er listaverk málað á vegginn sem er einskonar tákn hússins. Hana málaði Ragnar Engilbertsson árið 1947 er hann var við vinnu við að mála Ölfusárbrú þá um sumarið. Myndin er af Öxarárfossi og er óárituð. Ekki fékkst staðfest fyrr en árið 1999 hver ætti heiðurinn að þessu fallega verki sem prýðir húseignina að Eyravegi 8 á Selfossi.

Árið 1997 keypti svo Sigurður Guðmundsson húsið af bænum, gerði miklar endurbætur á því og opnaði svo Veitinga – og gistiheimilið Menam í húsinu sem á sér merkilega sögu í lífi og uppbyggingu Selfossbæjar

MENAM | Eyravegur 8 | Sími: 482-4099 | menam@menam.is |  Menam á Facebook